09 يونيو 2015

أحلى مقابلة مع نجم حياتي {طفلي}

Zeina Alazem | 04:28 |
طفلي نجم حياتي!

هو مو نشاط فني بقدر ما هو نشاط للتواصل، لتسمعي طفلك ويسمعك، ليتواصلو الأخوة بين بعضهم، يعني صحيح مالنا مشاهير ومافي كاميرات وباباراتزي لاحقينا وين ما رحنا بس إنه أطفالنا هم نجوم حياتنا، وممكن نعمل معهم أحلى مقابلة! 

نشاط عمل مقابلة مع الطفل لتشجيع التواصل والاستماع لأفكاره


- استخدمي أي شيء كمايكروفون، معلقة الخشب هي تبع المطبخ اذا عندك وحدة مو لازمتك زينوها مثلاً واتخيلو إنها مايكروفون، ولا أحلى من هيك. حضري أسئلتك لطفلك، أسئلة تكون لذيذة، متنوعة، جديدة يعني غير تبع (بتحب الماما ولا البابا وإنت فرحان بالعيد). 

- إذا عندك أكثر من طفل، شجعي كل واحد يحضر أسئلة لأخوه أو أخته وإلك ولأبوهم حتى، خليهم يعملو مقابلة معك وشوفي الحماس!

- سجلي أصواتهم ومقابلتك معهم، ممكن تبقى ذكرى صوتية حلوة

- رتبو الكراسي وحضروا المايكروفون، ممكن هالطفل المشهور يغير ملابس البيت ويلبس شيء خاص أو يضيف شيء على أواعيه نفسهم (طاقية، شال، نظارات...). الخيارات مفتوحة، وأنا بأكدلك إنه في شيء رح يفاجئك بأجوبتهم! 

- كل فترة رح نزل مقابلاتي مع بنتي، منه بعطيكم أفكار لأسئلة بجوز مو خاطرة ع بالكم، ومنه بحفظها للذكرى من نجمة حياتي.

- أحلى شيء لما سألتها لنجومتي (شو أهم عضو بجسمك برأيك) سألتني شو يعني برأيي هههه نسيت إني عم بحكي مع بنت عمرها 5 سنين. وأحلى جواب بمقابلتنا الأولى لما سألتها شو أكثر شيء بتحبيه بماما؟ قالتلي: كلــــــك كلك كلك.

بيسعدني جداً جداً إنكم تشاركونا أجوبة أطفالكم بهالنشاط، سواء بالتعليقات على المشاركة الأصلية على الفيسبوك أو على المدونة أو على الرسائل الخاصة بصفحة تفنن على الفيسبوك مع اسم الطفل وعمره لنشرها بالوقت المناسب بطريقة فنية. 

-------------------------------

مقابلة مع فراشة قلبي 1 حزيران 2015

- شو أهم عضو بجسمك برأيك؟ 
- شو يعني برأيي؟ ^_^
- يعني إنت شو بتفكري أهم عضو بجسمك؟ 
- مممم الإيدين. لإني بحب الإيدين، منمدهم ومنحمل ومنلمس فيهم الأشياء. 

- إنت بتعرفي إنه عنا خمس حواس، شو أكثر حاسة بتحبيها؟
- بحب العيون والأنف، بحب شم البطاطا المقلية (وفرطت من الضحك)

- برأيك الطفل الذكي مثلك لازم يسأل أسئلة؟
- (فكرت) إي لازم يسأل
- طيب ليه لازم يسأل الطفل؟ 
- ما بعرف إنت قوليلي بس لازم يسأل مشان أمه

- شو بتحسي لما ينزل مطر؟ 
- أنا بحب المطر لإن بيعطينا المي وبحب الشمس

- شو أكبر حيوان إنت بتعرفيه؟ 
- (صفنت وفكرت) حمار الوحش، ما بحبه يعني، حتى الأسد كبير وحتى النمر والحية
- الحية كبيرة؟ 
- لا، بس ما بحبها. ما بحب الحيوانات المفترسة. بحب الحيوانات الأليفة. اسأليني عن الحيوانات الأليفة

- شو بتحبي من الحيوانات الأليفة طيب؟ 
- القطة، الفيل
- بتحبي تركبي على الفيل؟
- نعــــــــــــــم

- شو أكثر طبخة بتعملها ماما بتحبيها؟ 
- همبرغر وبطاطا وتبــــــــــولة ومعكرونة وعدس ومعكرونة مع صوص ومعكرونة طويلة ويبرق وكب كيك وكوكيز

- آخر سؤال: شو أكثر شيء بتحبيه بمامــــا؟
- كلـــــــــــك
- طيب أكثر شيء؟ 
- كلك كلك كلك

لنسمع رأيك