10 يونيو 2015

سأزين بيتي لأغلى الضيوف .. أهلاً رمضان!

قبل ما نبدأ النشاط ونصمم أعلام لنزين فيهم البيت لنستقبل شهر رمضان بفرح وبسمة وحماس، حكيت لفراشتي بشكل مبسط عن رمضان وإنه هو شهر القرآن، شهر بحبه ربّ العالمين، وذكرتها إنه الصيام هو واحد من أركان الإسلام.

بس لخلصنا تلوين قالتلي بدي لحق آكل شوكولا الكندر قبل ما يجي رمضان. قلتلها ليه؟ قال مو إنت قلت بدنا نضل بلا أكل وشرب برمضان!!


نشاط للأطفال صنع أعلام وتزيين البيت بها مع قدوم شهر رمضان

زينتنا طلعت أحلى مما توقعتها، كنت مفكرة بدها تطلع كثير بدائية، بس فاجئتني وطلعت لذيذة وفعلاً عطت حركة لغرفة القعدة بالبيت. فراشتي بتحب تعرض أعمالها لهيك وقت خيرتها وين بتحب نعلق الزينة قال بغرفة القعدة ليشوفوها الضيوف. 

{ زينتنا الحلوة لرمضان الحلو }

- عملنا الزينة بورق أبيض عادي (نفس تبع الطباعة)، استخدمنا 8 ورقات وعطونا 24 علم، لوننا كل ورقة بألوان سائلة بس بدل الريشة استخدمنا فرشاية أسنان قديمة (الصورة 1) واسفنجة (الصورة 2).

- كملنا ثاني نهار وقصينا كل ورقة بشكل يطلع عنا 3 مثلثات (الصورة 3)

- زينّا منهم 12 علم بأشكال مختلفة: هلال (رمز لهلال رمضان) وشمس (رمز للصيام من الفجر حتى غروب الشمس) وقلب (رمز لحب رمضان) و 3 بطاقات مكتوب عليها (أهلا رمضان- رمضان كريم- رمضان حلو هيك سمته الآنسة بنتي)

- عندي خيط مصوف ملون استخدمته، أي خيط بينفع طبعاً، كان بدي علق الأعلام على الحبل باللاصق الشفاف (وراء كل علم بلصق الخيط بقطعتين لاصق صغار) بس بعدين غمزتني شكالة ورق مرمية على الطاولة وقالتلي أنا هون علقي فيني ^_^ ولقيت طريقة تعليق الأعلام بمشابك الورق paper clips أسهل وعملية أكثر لتعديل مكان الأعلام والمسافة بينهم (الصورة 4)

مراحل صنع زينتنا لشهر رمضان الكريم

 كل رمضان ونحن إلى الله أقرب، كل رمضان ونحن إلى السلام، إلى الحب، إلى الأمان، إلى العلم أقرب. 


لنسمع رأيك