09 مايو 2015

لمّا ألوانهم بتلمع عيونهم رح تلمع! نشاط التلوين على القصدير

Zeina Alazem | 15:43 |
شغلة موجودة بكل مطبخ، بس مين قال إنه استخدموها بس للطبخ وتغليف الصواني؟!  

{ورق القصدير} ممكن نعمل منه سطح مسلي جداً للرسم والفن للأطفال

نشاط التلوين على القصدير للأطفال الحلوين


فاجؤوهم، ومدو عالطاولة قطع كبيرة من ورق القصدير، أنا استخدمت اللاصق الشفاف ولزقتهم ببعض وبالطاولة على مهلي مشان ما يتخزق، واذا عندكم كذا ولد، يــــا سلام شو رح يكيفو، في حال بدت المشاكل على أنا هو بلون وإنت لا تلون محلي افصلو القوات المقصدرة ^_^ يعني افصلو قطع القصدير عن بعضها وخليهم يكملو النشاط بسلام. 

بهالنشاط واللي سبقه عم نستخدم ألوان مخصصة للأطفال سائلة وأهم الشي قابلة للغسل (يعني مكتوب عليها washable) الألوان المائية الحجر ضعيف أثرها وباهتة بهيك نشاطات. 

خليهم يختبرو لوحدهم ويكتشفو أثر الألوان على القصدير، بفطرتهم لحب التعلم رح يعرفو إنه أثره على الورق الأبيض مختلف، ممكن يستخدمو أصابعهم بالرسم، فرش رسم، اسفنج، أي شيء، {السماء حدودهم}. وهون بالصورة فراشتي كانت عم تكتشف انعكاس وجهها على القصدير الملون

القصدير سطح جذاب لكل طفل للتلوين عليه واختباره


خبروهم أو انتظرو ليصير الموضوع إنه إذا ضغطو على القصدير بينشق، حبو يرسمو عليه متل ما هو ممدود يرسمو، حبو يخزقوه ويجعلكو الألوان ببعضها متل ما بدهم. ما في صح وغلط هون، في خبرة وأدوات والطفل هو القائد، مو نحنا ;) 

واتذكروا  

لمّا ألوانهم بتلمع عيونهم رح تلمع!

بتمنالكم نشاط ممتع، وبفرحني تبعتولي صور عن تطبيقات أطفالكم، وأنا بنشرها اذا ما عندكم مانع بالوقت المناسب.



التعليقات