07 مايو 2015

صنع أشكال ثلاثية الأبعاد بالشلمون والمعجون

Zeina Alazem | 11:48 | |

طريقة مختلفة لتشكيل مجسمات ثلاثية الأبعاد، نفس مبدأ المكعبات لكن بأدوات مختلفة ومتوفرة، وما فيني اشرح أديه هالنوع من النشاطات بنمي ذكاء الأطفال وبشجعهم على التخيل وبفعل مهارة حل المشاكل، فينا نحكي للصبح عن فائدة المكعبات والنشاطات المشابهة. كثير بحب شجع الأطفال يحاولوا فيهم لإن بتحفزهم عالتفكير عكس التلفزيون تماماً.

 شلمون ومعجون نشاط صنع مجسمات ثلاثية الأبعاد للأطفال


أي نوع شلمون بيصلح للاستعمال أكيد، بس بما إنه الأطفال بحبو الألوان – الحقيقة مو بس الصغار والكبار كمان- ولرغب بنتي بالنشاط أكثر جبت شلمون ملون بدل الأبيض المخطط اللي عندي. بدت أول بتشكيل بسيط بعدين بس لاختبرت الأدوات اللي بين إيديها أكثر طلعت عالطاولة واتفاعلت معهم، وأنا قعدت على جنب راقبها – وصوّرها طبعا لزوم مشروع تفنَّـن ^_^

شلمون ومعجون_نشاط مجسمات ثلاثية الأبعاد

الشلمون ممكن يبقى فيه آثار معجون لهيك أكيد ما عاد يبقى صالح للشرب فيه، كل ما كانت قطع المعجون أكبر كل ما شكلت قاعدة أفضل، أما القطع الأصغر ممكن تشكل فواصل أفضل لوصل الشلمون ببعضهم، نترك الطفل يحاول يكتشف هالشيء بنفسه وممكن نشرح بشكل بسيط الفرق بالأوزان. ممكن الطفل يغير شكل الشلمون مثلاً يطويها أو يقصها.

ولما بتذكر هالنشاط بتذكر إني أول مرة قدمته لفراشتي من سنتين تقريباً كان عمرها 3 سنين ونصف، ما انسجمت فيه ولا كثير اتفاعلت مع الفكرة. كثير مهم نتعامل مع ردات فعل أطفالنا برواق ونستجيب لميولهم ونحنا نتبعها بدل ما يتبعوا رغباتنا.

إذا هلأ ما اتفاعلوا مع نشاط معين كنا محضرينه ومتحمسين عليه معليه، ما نتوتر أو نزعل أو نظلمهم بتقييمنا لذكائهم، الهدف من أي نشاط هو تقضية وقت ممتع معهم بالمرتبة الأولى، ما اتجاوبوا ما في أي مشكلة منغير النشاط ومنتجاوب نحنا معهم، ممكن نعرض نفس النشاط بعد فترة، واحتمال كبير يتفاعلوا معه بطريقة مختلفة. المرونة كثير مهمة وإلا بيتحول النشاط لواجب واختبار مهارات وذكاء!


التعليقات

  1. كتييير حبيت النشاط زنزونتي♥خطييرة الفكره ان شاالله حطبقه

    ردحذف