06 مايو 2015

أي مسلي أكثر؟ التلوين على الجسم أو على الورق

Zeina Alazem | 11:19 |
اسألوا ولادكم هالسؤال، وإلكم عليي صورة ولايك ببلاش اذا جاوبوكم إنه الورق أحلى ومسلي أكثر ^_^

نشاط تلوين الجسم نشاط ممتع جداً للأطفال


جربتو تقولو شي مرة هي الجملة السحرية لأطفالكم (اتفضلو لونو حالكم) ولونونا كمان اذا بدكم ^_^

تلوين الجسم من أمتع الخبرات بالألوان، ملمس اللون على الجسم، شكله والإحساس فيه خبرة حسية رائعة لكل طفل.

مستحيل أعطي بنتي ألوان وما تلون حالها إلا إذا طلعت وجه الوحش من الأول ونبهتها تنبيه جدي إنه ممنوع اليوم تلون حالها لسبب من الأسباب. جربوها بيوم تكونو ناوين تحممو فيه ولادكم، فبصير عندكم كائنات كربوجة مخمخمة شعرها منكوش وملونة، جاهزة للنقع والفرك بالحمام.

بتذكر من أربع سنين أول مرة عطيت فيها بنتي ألوان، قلتلها بدك تلوني وجهي وطار عقلها ولمعو عيونها وعملتني لوحة ما صارت (طبعاً عطلت عبلة الهبلة). أهم الشي تجيبو ألوان يكون مكتوب عليهم "washable" لو بلاقي منهم بالبراميل بشتريهم وبركض بغوص فيهم أنا وفراشتي.

آخر شغلة قد ما أكدت عليها ما بكفي، بهيك نشاطات احصرو اللعب بمكان واحد فقط اذا ما عندكم حديقة أو بلكون بالبيت، احصرو اللعب سواء بغرفة أو بزاوية معينة بالبيت، مع التنبيه على أطفالكم بإنه ممنوع يطلعو من هالمكان بوقت النشاط لوقت ما يخلصو، أي تجاوز ومحاولة كسر لهالقاعدة بيتبعها تنبيه مباشر ومع 3 تنبيهات بيلتغى النشاط بكل هدوء وبيتأجل لمرة ثانية. 


التعليقات

  1. فعلااا نشاط رااائع سعودة الله يرضى عليه مطبقه من زماااان

    ردحذف