13 مايو 2015

أكياس الورق أحلى لوحة جاهزة للتعليق!

Zeina Alazem | 14:29 |
رحنا مشوار واشتريت غرض إلي ورجعنا، حطيت الكيس بالممر والتفتت لتحضير الغداء، واذ فجأة وأنا مارة من جنب الكيس منتبادل الابتسامات وبتلمع اللمبة فوق راسي >>> هالكيس رح يصير أداة لنشاط جميل وشاعري ^_^

 نشاط  تلوين أكياس الورق البنية للأطفال


ضروري تقرأوا هالمشاركة مو بس لإني فعلاً تعبت عليها، لإنها بتحتوي معلومات أكثر ما تحتوي فكرة نشاط، أفكار استخلصتها خلال أربع سنين عن كيفية التعامل مع فنّ الطفل، كيفية تحفيزه والتعامل مع الجملة الشائعة "شو بدي ارسم" و "ارسميلي ما بعرف". هالكيس ما كان عرفان إنه رح يتسبب بكتابة أهم مشاركة بعتبرها لحدّ الآن. بشكرك يا كيس يا كبير! 

حلاوة هالنوع من الأكياس (الورق البني أو الأبيض) إنه جاهز ليتعلق كـ لوحة من إيده، وشو حلو إنه طفلك يلونه ويتفنن فيه وبعدين تحطي فيه هدية لخالته أو لصديقة مثلاً كنت حابة تهديها. لو تجيني هدية بهيك كيس عليه فن طفل بطير عقلي.

المهم حضرنا طاولة العمل وسألتها شو حابة ترسمي، مرّات بكون في فكرة ببالها من مسلسلات الأطفال ومرات بكربج مخها ^_^

تحضير طاولة العمل_نشاط التفنن بأكياس الورق

بكثير أوقات منطلع صور رسمات عالانترنت من خلال خيار بحث الصور بجوجل لتاخد أفكار وتستوحي من الصور خاصة لما يكربج مخها. ما منقلد الأفكار، يعني ولا يمكن قلها اعملي مثل هي الصورة، بقلها "رح نعمل أحلى منها"، هي فكرتها حلوة كيف عاملين فيها مثلاً مربعات، فينا نعمل مثلثات أو أي شكل بتحبي.

بهاد النشاط كانت مخبرتني إنها حابة ترسم جواهر jewels دورنا على صور لجواهر وكتبت بالجوجل jewels drawings kids (رسمات جواهر أطفال) بعدين ونحنا عم ندور عجبتنا صورة بس فجأة غيرت عقلها وقالتلي "بدي اعمل crystal heart (قلب كريستال) اكتبيه ماما" وكتبنا crystal heart drawings kids وطلع معنا صورة وعجبتها كثير لإن لقتها بتعبر عن اللي بخيالها. 

بدت ترسم وطبعاً أول تكشيرة ظهرت، "كيف بدي ارسم"، قلتلها ارسمي قلب، رسمت بعدين قلتلها تطلع عالرسمة منيح وتحاول تفصل خطوطها يعني شو نوع الخطوط اللي فيها (مائلة، متعرجة، مستقيمة)  وبدت ترسمهم مع شوية إرشادات مني بدون ما أمسك القلم وارسملها ولما تطلب ارسملها بقلها "أنا بحبّ إنك تحاولي أو بتصير هي لوحتي مو لوحتك".

مراحل نشاطنا في تلوين الكيس البني وكيفية التعامل مع فن الطفل

نترك أطفالنا يختاروا ألوانهم ولو بنظرنا هي الألوان ما بتلبق مع بعض، أي شيء جديد مسكه الطفل وحاول فيه شجعيه بكلمات كلها حب وثقة وفخر "برافو عليك، عم تجرب شغلات جديدة، هي ما خطرت على بالي" وبهالنشاط أنا فعلاً ما خطرلي نطبع على سطح الكيس بعلبة اللون (الصورة 3 و 5) وكبديل غطاء أي قنينة بيعمل نفس الأثر، ولما قربنا ننتهي ما لقيتها غير أخدت ريشة رفيعة وبدت تلون إيد الكيس، فرحت كثير لإن ولا خطرلي إنها اقترح عليها هالفكرة (الصورة 6).  

برجع بأكد عليكم لا تقولولهم ارسمو هي، أو بدي ترسم مثل هي الصورة، أو ترسم مثل رسمتي، لو فراشتي وقفت بالنشاط عند الصورة 4 وقالتلي هي لوحتي وأنا خلصت ، بقبل منها وبعلقها وبخبر كل مين زارني عنها.

لا تصلحوا رسماتهم، ولا اطالبوهم بشيء بخيالكم إنتو مو بخيالهم، واسمعوا كيف بعبروا عن فنهم! 

وآخر فكرة إنه بنتي صرلها أربع سنين بتشتغل وبتختبر أدوات جديدة، لا تقارنو شغلها بشغل أطفالكم وتقولو والله أنا بدي يطلع مع ابني نفس هاللوحة، خط أحمر أحمر أحمر، مو لإن شغل بنتي شيء ما صار، أبدا شغلها جداً طبيعي بس عم يطور، وعم يطور بأسلوبها اللي بيختلف عن أسلوب طفلك، وطفلك أسلوبه وتفكيره بيختلف عن طفل صديقتك وهيك.

من هلأ ورايح أنا واثقة إنكم ما عاد تكبو كيس ورق، رح تعطوه لأولادكم ليعملو أحلى فنّ وتتذكروني! وشو بحب المحل اللي كياسه ورق مو نايلون وبعطيه الأولية لدور على غرضي عنده، يعني كسب زبونة بكيس محله مو بس ببضاعته.


التعليقات

  1. واااااااو زنزون حبيت كتييير و تؤبشني نانو أحلى فنانة
    جاري التطبيق ان شاءالله

    ردحذف